2Cor 6 | DOB | STEP | 'Enega tauna ma'emai 'apaipaisewa, ga 'emiya 'asida be geya'abo Yaubada 'ina oboboma waeyage besobesoe,

2 Corinthians 6

Paulo 'ina 'elouyao

1 'Enega tauna ma'emai 'apaipaisewa, ga 'emiya 'asida be geya'abo Yaubada 'ina oboboma waeyage besobesoe, 2 manuna 'igwae,

“Tuta bobo'ana 'enaya 'enayo yanonona, 'enega 'etoseyana 'ana 'asiyata 'enaya yalemeyo.”

Ona'ai'aila, batuwa tuta bobo'ana be 'aene 'ami 'etoseyana wada loba.

3 'Etoseyana gete tomota maibo'adi manudi. Geya nuwama be 'ebweu yaita 'ilomulomugiyema 'ima guinuwao manudi. Nigeya 'ebweu wate 'ebe 'etoboda 'asa'usa'u, 4 ta esi 'ima guinuwao maibo'ana bobo'ana Yaubada manuna, be 'ediyega wada 'awabobo'anema. 'Ima guinuwa getedi: 'alama'i'ita sinabwana, 'elouya, miyamwau, esilae, 5 sapi, 'ebeyona, saiya, paisewa, yawemasala, botana, 6 bubuna 'esasena, mwalatoi, 'atenuwa'ole'ole, eobooboboma, Yaluyaluwa Tabuna 'atedaya, oboboma 'ai'aila, 7 be ona 'ai'aila, ta wate Yaubada 'ina waiwai 'emaya, gete 'ima gwegwe saiya 'ataimega be gegeumimega, nate 'ima bubuna palupaluna. 8 'Aina tuta tomota si'awa bobo'anema ta 'aina tuta si'awa to'umaliyema. Ona'ai'aila si'awa kabokaboema, ta esi nigeya 'akabokabo. 9 Wate tomota nigeya simwalamwalatonima ta Yaubada esi 'imwalamwalatonima. 'Abo'ama 'atuwa mwawamwawasima ta esi ma yawasima bobo'ana. Sigie to'umaliyema ta nigeya siloeloemwawasima. 10 'Abo'ama ma ima nuwamwau ta esi 'atemaya 'agwaugwausowala. 'Abo'ama 'atuwa gomabeso ta esi esaesa 'aegueguyai tomota yaudi 'ediya. Nigeya wate 'ima gwegwemo, ta esiya yage maibo'ana 'emaya simiyami.

11 Gosegwao me Kolinita 'omi, 'agu lotoona maibo'ana ni'atu yasimana apwesena 'emiya, 12 ga 'ateguyega yaobobomemi, ta esi nigeya wada gwausowala 'eguya. 13 'Enega natugwao, 'ilobwenena be 'atemiyega wada obobomegu.

Geya'abo sena guguyoi 'ena walugulugu

14 Geya'abo watubwetubwemi taudi nigeya siemiemisa Keliso 'ena ma'emiyao, manuna nigeya sawesawenaya bubuna bobo'ana be to'umalina ma'ebweuna waguiguinuwa. Wate nigeya sawesawenaya maedana be guguyoi ma'iyana siegosigosiyana. 15 Wate nigeya sawesawenaya Keliso be Seitani ma'iyana siegosigosiyana. 'Eguma Keliso 'ena 'uemisaya, nigeya sawesawenaya tomota taudi nigeya siemiemisa ma'emwao waguinuwa leleleya. 16 Wate nigeya sawesawenaya mali 'ebe emisao wasa'u luguyedi Yaubada 'ina anuwa solanaya, ta Yaubada tauna mayawasina ga 'ina anuwa 'abo'ada, ta 'igwae,

“ ‘'Abo'agu taudi 'ediya yada e'asa be soladiya yada adadana, be 'abo'agu 'idi Yaubada ta taudi 'igu tomotaiyao.’ 17 'Enega Yaubada wate 'igwae, ‘Mali boda 'ediyega wada apwesa be wapilisinedi, be geya'abo yage baibailidi wagitogitoodi, be yada 'au'ewami 'igu senaya, 18 ta 'eguya wada 'awatamana, be 'omi natugwao me'olotomi ta natugwao mewainemi.’ Gete Yaubada Toewaiwai sana 'ina ona.”